साउनको अन्तिम सोमबार पशुपतिनाथसहित देशभरका शिवालयमा भक्तजनको घुइँचो

२५ साउन, काठमाडौं । साउन महिनाको अन्तिम सोमबार काठमाडौंको पशुपतिनाथ मन्दिरसहित देशभरका शिवालयमा श्रद्धालुहरूको ठूलो घुइँचो लागेको छ।

साउनका सोमबार व्रत बसेर भगवान शिवको पूजा गर्दै आएका महिलाहरूले आज विधिपूर्वक व्रत समापन गर्दैछन्। धार्मिक मान्यताअनुसार साउनका अन्य सोमबार व्रत बस्न नसके पनि अन्तिम सोमबार व्रत तथा पूजाआजा गर्दा मनोकांक्षा पूरा हुने विश्वास छ।

अन्तिम सोमबार भक्तजनको संख्या बढी हुने भएकाले पशुपतिनाथमा बिहानैदेखि व्रतालु तथा दर्शनार्थीहरू लामबद्ध भएका थिए। बोलबम तीर्थालुहरूले सुन्दरीजलबाट जल ल्याएर पशुपतिनाथमा चढाउँदै पूजाआजा गरेका छन्।

पशुपतिनाथसँगै भक्तपुरको डोलेश्वर, ललितपुरको कुम्भेश्वर, हलेसी महादेव, पिण्डेश्वर, गलेश्वर, कुशेश्वर, गुप्तेश्वर, कपिलेश्वर, जलेश्वरलगायत देशभरका प्रमुख शिवालयमा पनि बिहानैदेखि भक्तजनको भीड लागेको छ।

त्यस्तै, चितवन, नवलपरासी र तनहुँको संगमस्थल देवघाटधाममा समेत साउनको अन्तिम सोमबार पूजा तथा बोलबम मेलाका लागि ठूलो संख्यामा श्रद्धालुहरू पुगेका छन्।