पाँच महिनाको विदेश बसाइपछि स्वदेश फर्किए देउवा, भने– “समुन्नत मुलुक बनाउने यात्रामा समर्पित हुन फर्किएँ “

काठमाडौं, २८ । नेपाली कांग्रेसका निवर्तमान सभापति शेरबहादुर देउवा पाँच महिना लामो उपचारपछि बिहीबार स्वदेश फर्किएका छन्। सिंगापुरमा उपचारका लागि गएका देउवा बिहीबार दिउँसो साढे १२ बजे त्रिभुवन अन्तर्राष्ट्रिय विमानस्थलमा अवतरण गरेका हुन्।

स्वदेश फर्किएलगत्तै अपिलपत्र जारी गर्दै देउवाले आफ्नो स्वास्थ्यप्रति चासो र चिन्ता व्यक्त गर्ने सबैप्रति आभार व्यक्त गरेका छन्। उनले आफू अहिले सेवकका रूपमा जनतामाझ उपस्थित भएको बताएका छन्।

देउवाले भनेका छन्, “आज यहाँ विनम्र सेवकका रूपमा उपस्थित भएको छु—सुन्न, सिक्न र समुन्नत मुलुक बनाउने यात्रामा समर्पित हुन।”

उनले पाँच महिनापछि स्वास्थ्य उपचार सकेर कृतज्ञताले भरिएको हृदय र परिवर्तनका सम्भावनालाई आत्मसात् गर्ने खुला चेतनासहित आफू जनतामाझ फर्किएको उल्लेख गरेका छन्।