कांग्रेस महाधिवेशनको नयाँ कार्यतालिका सार्वजनिक

काठमाडौं । नेपाली कांग्रेसको केन्द्रीय निर्वाचन समितिले १५ औं महाधिवेशनको संशोधित कार्यतालिका सार्वजनिक गरेको छ ।

मंगलबार प्रेस विज्ञप्ति जारी गरेर सार्वजनिक गरिएको संशोधित  कार्यतालिकाअनुसार महाधिवेशनको उद्घाटन १८ असोजमा हुने भएको छ ।

समितिका सदस्य सचिव राजु कटुवालद्वारा जारी विज्ञप्तिमा १५ औं महाधिवेशन उद्घाटन समारोह १८ असोज २ बजे खुल्ला मञ्चमा सुरु हुने उल्लेख छ ।

उनका अनुसार बन्द सत्र र अन्य कार्यक्रमहरू १९ र २० असोजमा हुने छन् ।

यस्तै, निर्वाचन कार्यक्रमका लागि २१ र २२ असोजका दिन तोकिएका छन् ।

‘निर्वाचन कार्यक्रमसम्बन्धी अन्य कार्यक्रम र विस्तृत कार्यतालिका पछि प्रकाशित गरिने छ,’ विज्ञप्तिमा भनिएको छ ।

निर्वाचन समितिले प्रतिनिधि १५ असोजसम्म क्षेत्रीय अधिवेशन सम्पन्न गरी महाधिवेशन प्रतिनिधिको नामावली पठाइसक्न भनेको छ ।

महाधिवेशन प्रतिनिधि रजिस्ट्रेसन दर्ता गर्ने समयावधि १६ र १७ असोजका लागि तोकिएको छ ।