काठमाडाैं। नेपाल प्रज्ञा प्रतिष्ठानले ६३औं वार्षिकोत्सवका अवसरमा ९ असारमा हुने राष्ट्रिय कविता महोत्सव-२०७७ का लागि कविता आह्वान गरेको छ।

इच्छुक कविले समसामयिक विषयमा लेखिएका १५० शब्दसम्मका कविता २५ जेठभित्र बुझाउन सक्ने प्रतिष्ठानका सदस्य सचिव प्रा. जगतप्रसाद उपाध्यायले बताए। उनले गत वर्षदेखि वाचनसहितको मूल्याङ्कन गरिएकाले महोत्सव हुने समयसम्म कोरोनाको जोखिम कायम रहेमा कार्यक्रम पर सानुपर्ने हुन सक्ने जनाए।

महोत्सवका लागि बुझाइने कविता पूर्णतः मौलिक हुनुपर्ने र महोत्सव सम्पन्न नभएसम्म कुनै पनि विद्युतीय वा छापा माध्यममा प्रकाशन एवम् प्रसारण गर्न नपाइने प्रतिष्ठानका काव्य विभाग प्रमुख प्रा.डा. हेमनाथ पौडेलले जानकारी दिए।

महोत्सवमा प्रथम हुनेलाई स्वर्णपदकसहित ३० हजार, द्वितीय हुनेलाई रजत पदकसहित २५ हजार र तृतीय हुने तीनजनालाई जनही काँस्यपदकसहित  २० हजार रूपैयाँका दरले सम्मानपत्रसहित पुरस्कार प्रदान गरिनेछ।