सल्यान कपुरकोटमा आँखा उपचार र मोतियाबिन्दुको शल्यक्रिया सेवा शुरु

सल्यान। सल्यानको कपुरकोट गाउँपालिकामा आँखाको नियमित जाँचदेखि मोतियाबिन्दुको शल्यक्रियासम्मको सेवा सुरु भएको छ।

कपुरकोट आधारभूत अस्पतालमा स्थापना गरिएको आँखा उपचार केन्द्रले शनिबारदेखि औपचारिक रूपमा सेवा सुरु गरेको हो। गाउँपालिका र राप्ती आँखा अस्पताल रक्षाचौर, दाङको सहकार्यमा केन्द्र सञ्चालनमा ल्याइएको हो।

केन्द्रबाट आँखाको नियमित जाँच, सामान्य उपचार तथा आवश्यकताअनुसार मोतियाबिन्दुको शल्यक्रियासमेत गरिनेछ। यसअघि आँखासम्बन्धी समस्या हुँदा उपचारका लागि श्रीनगर, दाङ र नेपालगन्ज पुग्नुपर्ने बाध्यता थियो।

केन्द्र सञ्चालनका लागि आवश्यक उपकरण तथा व्यवस्थापन गाउँपालिकाले गरेको छ भने राप्ती आँखा अस्पतालले दुई जना स्वास्थ्यकर्मी उपलब्ध गराएको छ।

गाउँपालिका अध्यक्ष दुर्गाबहादुर पुन र नेपाल नेत्रज्योति संघ दाङ शाखाका सभापति कृष्णकुमार गिरीले संयुक्त रूपमा केन्द्रको उद्घाटन गरेका हुन्।

केन्द्रबाट बिहान १० बजेदेखि दिउँसो ३ बजेसम्म सेवा उपलब्ध हुने जनाइएको छ। उपचार शुल्क भने राप्ती आँखा अस्पतालको नियमानुसार लाग्नेछ।

स्थानीयस्तरमै नियमित आँखा उपचार सेवा सुरु भएपछि नागरिकको समय र खर्च बचत हुनुका साथै उपचारमा सहज पहुँच पुग्ने अपेक्षा गरिएको छ।