विश्वव्यापी महामारीको रुपमा फैलिएको कोरोना भाइरसको विरुद्धमा लगाइने खोप सुरक्षित एवं उचित व्यवस्थापन गर्नका लागि शहरी विकास मन्त्रालयले सातवटै भण्डारण गृह निर्माणलाई अगाडि बढाएको हो। प्रदेश १ को विराटनगरस्थित प्रदेश ल्याब बनाउने स्थानमा, प्रदेश २ को जनकपुरस्थित ग्रामीण विकास प्रशिक्षण केन्द्रको परिसरमा र बागमती प्रदेशको हेटौंडास्थित कीटजन्य रोग अनुसन्धान तथा तालीम केन्द्रको परिसरमा भण्डारण गृह निर्माण गरिँदै छ।

त्यस्तै, गण्डकी प्रदेशको स्वास्थ्य कार्यालय कास्कीको परिसरमा, लुम्बिनी प्रदेशको बुटबल उपमहानगरपालिका–१२ तामनगरमा, कर्णाली प्रदेशको सुर्खेतस्थित स्वास्थ्य निर्देशनालयको परिसरमा र सुदूरपश्चिम प्रदेशको धनगढीस्थित स्वास्थ्य तालीम केन्द्रको परिसरमा भण्डारण गृह निर्माण गर्न लागिएको हो। केन्द्रीय भण्डारण गृह पथलैया मेडिकल स्टोरको परिसरमा रहने मन्त्रालयले जनाएको छ।

मन्त्रालयको शहरी विकास तथा भवन निर्माण विभागको स्वास्थ्य भवन शाखा प्रमुख सुरोज पौडेलका अनुसार प्रति भण्डारण गृह रु. १ करोड २० लाखका दरले खर्च हुनेछ। आठ वटा भण्डारण गृह निर्माण गर्न रु.९ करोड साठी लाख खर्च हुने अनुमान छ।

प्रदेश २, कर्णाली प्रदेश तथा सुदूरपश्चिम प्रदेशअन्तर्गत निर्माण हुने खोप भण्डारण केन्द्रको ठेक्का सम्झौता भएर कार्यादेश दिइसकिएको छ भने प्रदेश १ तथा लुम्बिनी प्रदेशअन्तर्गत निर्माण हुने भण्डारण गृहको बोलपत्र स्वीकृत भई कार्य सम्झौता गर्न पत्राचार भइसकेको उनले बताए। बाग्मती, गण्डकी प्रदेश तथा केन्द्रीय भण्डारण गृहको बोलपत्र स्वीकृत गरी आशयको सूचना प्रकाशन भएको पौडेलले बताए।

कार्यादेश दिएको दुई महिनाभित्र निर्माण कार्य सम्पन्न भई प्रयोग गर्न मिल्नेछ। भण्डारण गृहमा सम्बन्धित प्रदेशका लागि आवश्यक खोप प्रदेशअन्तर्गतको भण्डारण गृहमा राखिने तथा बाँकी खोप आवश्यकता बमोजिमको प्रयोजनका लागि केन्द्रीय भण्डारण गृहमा राखिनेछ। (रासस)