विश्वव्यापी महामारीको रूप लिएको कोरोना भाइरस भनिने कोभिड–१९ का कारण यतिबेला विश्वका अधिकांश मुलुक लकडाउनको अवस्थामा पुगेका छन्। लकडाउनका कारण घरमै बस्नुपरेकाहरुले केही चिकित्सकीय परामर्श चाहिएमा मोबाइल एपमार्फत लिन सकिने भएको छ।

हाम्रो डाक्टर नाम रहेको मोबाइल एप डाउनलोड गरी विभिन्न विशेषज्ञ चिकित्सकसँग गोप्यरूपमा परामर्श लिने सकिने एप्लिकेसनका सिइओ उद्धवराज भेटुवालले जानकारी दिए। सन् २०१६ मा सुरु भएको एपले हाल अनलाइन परामर्श सेवा, अस्पतालमा टिकट बुकिङ गर्नेलगायत थुप्रै स्वास्थ्य सेवा सहजीकरणको सेवा दिइरहेको छ। एण्ड्रोइड र आइओएस प्लेस्टोरमा उपलब्ध एप्लिकेसनमा परामर्शका लागि सयौं विशेषज्ञ चिकित्सकहरू उपलब्ध रहेको भेटुवालले जानकारी दिए। एपका साथै हाम्रो डाक्टर डटकममा पनि यो सुविधा रहेको छ।

मोबाइल एप्लिकेसनमा उपलब्ध चिकित्सकहरूसँग सःशुल्क र निःशुल्क दुवैखालको परामर्श सेवा लिन सकिन्छ। परामर्श सेवामा बिरामीले आफ्ना जिज्ञासा व्यक्तिगतरूपमा गोप्य ढंगले पनि सोध्न सक्छन्। परामर्शको क्रममा एप प्रयोगकर्ताले डाक्टरलाई एपबाटै रिपोर्ट र फोटो एवं भिडियोसमेत देखाउन सक्छन् । एप्लिकेशनबाट विस्तारै भिडियो परामर्शको सेवा पनि लिनसकिने एपका सिटिओ अशोक बस्नेतले जानकारी दिए।

निःशुल्क रूपमा प्लेस्टोरमा उपलब्ध एप डाउनलोड गरी यस विषम अवस्थामा आफ्ना स्वास्थ्य समस्या तथा जिज्ञासाका बारेमा डाक्टरहरूसँग सहजै परामर्श लिन हाम्रो डाक्टरले सबैलाई अपिल गरेको छ। एपबाट लिन मिल्ने सःशुल्क परामर्शका लागि सबैजसो डिजिटल पेमेन्ट गेटवेबाट शुल्क तिर्न सकिन्छ। हाम्रो डाक्टरमा ईसेवा, फोन पे, खल्ति, आइएमई पे, ईबैंकिगबाट समेत पैसा तिर्नसकिन्छ। यसका अलावा विदेशमा रहनेहरूले क्रेडिटकार्ड एवं मास्टरकार्डबाट पनि भुक्तानी गर्नसकिन्छ।

कोरोना भाइरसबाट उत्पन्न त्रास र लकडाउनको अवस्थामा अस्पताल जान नसकेका चिकित्सकसँग परामर्श र उपचार सेवा नराम्ररी प्रभावित भएको छ। यो अवस्थामा चिकित्सक, अस्पताल तथा जनस्वास्थ्यविदहरूले घरमै बसेर चिकित्सकसँग अनलाइन परामर्श गर्न प्रोत्साहित गरिरहेका बेला यो एपका बारेमा धेरैभन्दा धेरैले जानकारी पाउन आवश्यक देखिएको छ। कोरोना भाइरसका कारण जनजीवन अस्तव्यस्त भएका बेला एप्लिकेसनले आफ्ना सेवाहरूमा २० प्रतिशत छुटसहितको कुपनकार्ड वितरण गरिरहेको छ। सो कोड हाम्रो डाक्टरको फेसबुक पेजमा पाउन सकिन्छ।